२३ पौष २०७६ बुधवार
तेहरान– इरानले इराकस्थित अमेरिकी सेनाको आधार शिविरमा गरिएको आक्रमणमा ८० अमेरिकी सैनिकको मृत्यु भएको दाबी गरेको छ ।
इरानी स्टेट टेलिभिजनले इराकस्थित अमेरिकी सेनाका २ वटा आधार शिविरमा गरिएको आक्रमणमा ८० अमेरिकी सैनिक मारिएको दाबी गरेको हो ।
यद्यपि अमेरिकाले भने उक्त आक्रमणमा भएको क्षतिबारे कुनै विवरण सार्वजनिक गरेको छैन ।
अमेरिकाको एयर स्ट्राइक (हवाई हमला)मा आफ्ना सैन्य कमाण्डर कासिम सुलेमानी मारिएपछि क्रुद्ध बनेको इरानले मंगलबार राति इराकस्थित अमेरिकी सेनाका २ वटा हवाई अड्डामा मिसाइल (क्षेप्यास्त्र) आक्रमण गरेको थियो ।
अमेरिकी राष्ट्रपति डोनाल्ड ट्रम्पले सामाजिक सञ्जालमा एक सन्देश लेख्दै इरानले गरेको आक्रमणको समीक्षा गरिरहेका बताएका छन् ।
इरानले मिसाइल आक्रमण गरेको खबर बाहिरिएपछि ट्रम्पले माइक्रो ब्लगिङ साईट ट्वीटरमा एक सन्देश लेख्दै भनेका छन्– ‘अहिले सबै ठीकठाक छ ! इरानबाट इराकस्थित दुई सैनिक आधार शिविरमा मिसाइल आक्रमण भएको छ । क्षतिको विषयमा अहिले समीक्षा भइरहेको छ । हामीसँग सबैभन्दा शक्तिशाली र सुसज्जित सेना छ । भोलि (बुधबार) विहान म यस विषयमा एक स्टेटमेन्ट जारी गर्ने छु ।’
